ยินดีต้อนรับ เข้าสู่ การละเล่นพื้นบ้าน

หนอนซ้อน จำนวนผู้เล่น : สิบคนขึ้นไป (จั่งสิม่วน) การคัดโต : วิธี จ้ำ ปิ่ง จ้ำ ดอง สถานที่และการเตรียม: เดิ่น หรือบริเวณกว้าง ๆ ....หลังจากได้ผู้ที่เป็นหนอนแล้ว คนที่เหลือ ยืนเป็นวงกลม เป็นคู่ๆ ผู้นึงยืนทางหน้า ผู้นึงยืนซ้อนอยู่ทางหลัง โดยแต่ละคู่ ยืนระยะห่างกัน พอสมควร (ยืนให้เป็นวงใหญ่ๆ โลด หนอนจั่งแล่นเมื่อยดี) เหลือไว้อีกผู้นึงที่เป็นผู้เศษ เอาไว้แล่นล่อ แล่นซ้อน อย่างเช่น ถ้ามีผู้เล่นเทิงเหมิดสิบคน ตัดหนอนออกไป กะเหลือเก้าคน จับคู่กัน กะได้สี่คู่ เศษผู้นึงพอดี ....หรือถ้ามีผู้เล่นเทิงเหมิดสิบเอ็ดคน ตัดหนอนออกไป กะเหลือสิบคน จับคู่กันกะได้ห้าคู่พอดี แต่ถ้าจัดเป็นห้าคู่ กะสิบ่มีคนแล่นล่อ แล่นซ้อน หนอนกะแต้มเอาไผบ่ได้ มันกะเล่นบ่ได้ กรณีแบบนี้ กะให้คนสองคน เป็นผู้เศษ เป็นผู้แล่นซ้อน (หรือถ้ามีคนเล่นหลายคักๆ ผู้แล่นซ้อนกะควรสิมีสองคนขึ้นไป)     หนอนซ้อน

กติกา : ผู้ที่ยืนซ้อนกันอยู่สองคน ถือว่าปลอดภัย หนอนสิแต้มเอาบ่ได้ หนอน แต้มเอาได้เฉพาะผู้ที่บ่ได้ยืนซ้อนกัน (ผู้ที่กำลังหาหม่องซ้อน) หรือคนหลังสุดที่ยืน ซ้อนสาม หรือ ถ้ายืนซ้อนกันห้าคน กะสามารถแต้มเอา คนที่สาม คนที่สี่ หรือคนที่ห้า กะได้ ถ้าฮู้โตว่า เจ้าของ เป็นคนที่สาม(นับจากคนหน้า) ก่อนหนอนสิมาแต้ม ให้ฟ้าวแล่นหา หม่องซ้อนใหม่ ทันที การเข้าซ้อนคู่ที่เขายืนซ้อนกันอยู่แล้ว ต้องซ้อนทางหน้า (ถ้าซ้อนทางหลัง เจ้าของกะสิเป็นคนที่สาม กะอาจสิถืกแต้มได้) หนอน ต้องแต้มถืกผู้อื่น(ผู้เข้าข่ายแต้มได้) จั่งสิพ้นความเป็นหนอน ผู้ที่ถืกหนอนแต้ม ต้องกลายเป็นหนอนแทน การแต้ม ห้ามแต้มคืน หรือว่าห้ามแต้มเอาผู้เก่า (ที่เพิ่งพ้นความเป็นหนอน)

วิธีการเล่น : หนอน ไล่คุมแต้มเอาผู้ที่เข้าข่ายแต้มได้ ซึ่งกะคือผู้เศษ ผู้เศษย่านถืกหนอนแต้ม กะต้องแล่นไปซ้อนทางหน้า คู่ที่เขาซ้อนสองอยู่แล้ว... ถ้าเข้ายืนซ้อนบ่ทัน หนอนแต้มได้ก่อน ผู้นั้น กะต้องกลายเป็นหนอนแทน ถ้าเข้ายืนซ้อนทัน กะสิเฮ็ดให้กลุ่มนั้น กลายเป็นซ้อนสามคน คนผู้ทางหลังของกลุ่มที่ซ้อนสาม หรือคนที่สามกะเข้าข่ายแต้มได้ คนผู้นั้นย่านถืกแต้ม กะต้องฟ้าวแล่นไปหาซ้อนทางหน้าคู่อื่น.... ถ้า ในขณะที่ผู้อื่น เข้ามายืนซ้อนทางหน้า แล้วผู้ทางหลังซึ่งเป็นคนที่สาม แล่นหนีบ่ทัน ถืกหนอนแต้มได้ ผู้นั้น กะต้องกลายเป็นหนอนแทน..... หนอนกะแล่นไล่คุมไปเรื่อย คนเล่นกะแล่นหนี แล่นซ้อนไปเรื่อยๆ .... หนอนแต้มถืกผู้ได๋ที่เข้าข่ายแต้มได้ ผู้นั้น กะต้องกลายเป็นหนอนแทน แล้วกะไล่คุมแต้มผู้อื่นต่อไป ...ผู้เล่นที่ต้องการอยากแกล้ง ผู้ได๋(ที่ยืนทางหลังของคู่) กะมักสิเข้าไปซ้อนทางหน้าคู่นั้น เพื่อให้ผู้นั้น ถืกหนอนแต้ม กะมี...

หมายเหตุ การแล่นเข้ายืนซ้อนทางหน้า ไปเรื่อยๆ บ่ทันดน สิเฮ็ดให้วง จ้อมเข้าๆ หรือวงน้อยลงๆ ดังนั้น ผู้เป็นหัวหน้าพาหมู่เล่น กะให้สังเกตเบิ่งวงนำ ถ้าวงจ้อมเข้าพอสมควรแล้ว กะให้ฮ้องบอก ให้เซาจักคราว แล้วให้ทุกคน ถอยหลัง ขยายวงออกไป ให้ใหญ่คือตอนแรก แล้วจั่งค่อยเล่นต่อ  

วิเคราะห์ ถ้าผู้เล่นมี 18 คน ก็จะมีคู่อยู่ 8คู่ 1คนจะเป็นหนอนและอีกหนึ่งคนจะเป็นตัวเศษ สำหรับความน่าจะเป็นนั้น หนอนและตัวเศษมีโอกาสแพ้และชนะเท่ากัน

จบการนำเสนอ ขอบคุณค่ะ